ابدأ كلامىبحسبي الله ونعم الوكيل
مش عارفة في مين بس يلا حسبي الله ونعم الوكيل وخلاص
كتبت خلال الفترة اللى فاتت قبل الاجازة عن كابوس الامتحانات
ودلوقتي مش عارفة اكتب كلمة ايه غير كابوس تعبر عن كمية الحزن والخوف اللى انا حاسة بيه
ولو قلت كلمة كابوس دى حتبقى كلمة صغيرة اووى على الباشمهندس " المدرسة" !!
ومهما جيبت كلام فيه ولا عليه مش حوفيه حقه
الحاجة الوحيدة اللى مفرحانى وفي نفس الوقت مخوفانى
انى دخلت مرحلة جديدة " الثانوية العامة "
للللللللللووووووولللى
مين كان يصدق ان ندى العيلة الصغيرة دخلت ثانوية عامة
دة انا كنت ماسكة في ابتدائي بايدي وسناني
قضيت 7 سنين في ابتدائي
سنة مستمعة " يعني بسمعهم بس من غير ما امتحن ولا حاجة "
والخمس سنين العاديين
والقنبلة اللى بتنفجر فيا انا اول واحدة
انى اكون اول دفعة تتطبق عليها سنة سادسة ابتدائي
كانوا اللى يشوفونى يقولولى انتى مش عايزة تكبري بقى !!
مش قادرة اوصف لكم فرحتى اد ايه انى بقيت في ثانوية عامة
دة مفرحنى 30 %
اما ال 70% الباقيين
متقسمين ع الاّتى ( اختر الاجابة الصحيحة :)) )
ان انا للأسف للأسف اختى دخلت كلية خلاص ودى تاني سنة ليها
ربنا يوفقها يارب معنى كدة حتقعد تتريق عليا 24 ساعة وربنا ما يوريكم !!
ثانيا ان العبدة لله ناوية على علمى وكل اللى في العيلة لما يسألونى حتدخلى ايه
اقولهم علمى ( وكأنى قلت لهم بلوة ولا مصيبة او كأن يعني علمى دة عار في العيلة !!! )
يقولولى " اول واحدة حتطلع فاسدة في العيلة !! علمى يا بنتى ايه انتى بتهزري انتى عايزة تضحكي العيلة
علينا لما تسقطى من اول سنة !! خليكي ادبي دة علمي دة فيزياء وكيمياء واحياء ومصايب ما انتيش قدها )
احباااااااااط ربنا ما يوريكم وانا اقعد اراجع نفسي واقول لا لا لا علمى سهل وحلو وان شاء الله حعدى
والمشكلة ان اختكم كمان موسوسة يعني مش واثقة انى حوصل لمجموع حلو
وربنا يستر وماتنزلش عليا اى قنابل تانية وتقول انهم خلاص لغوا موضوع التحويل من علمى لادبي !!
ربنا يستر
بس انا اصلا بكره موضوع الادبي دة مين دى اللى عندها القدرة السنة دى تدرس تاريخ وفلسفة وعلم نفس
وحاجات غريبة
احنا نخلينا في اللى بنحبه
علمى علوم !!!
هو كدة يا اما بلاش
تالت حاجة بقى موضوع الانفلونزا دة .. والله انا مش حنكر انى خايفة منه بس مش اوى
اللى خايفة منه اكتر الحقنة بتاعت التطعيم !!!
يا نهااااااااااار منيل بستين نيلة ، حقنة ! لا لا يمكن انا اخد حقن
دة انا ما صدقت انى خلصت من ايام التطعيمات لا وايه
ماحدش يعرف ايه الحقنة دى ماممكن تكون حقنة 24 سنتيميتر تبقى مصيبة
انا مستعدة اعمل اى حاجة الا الحقن
نو نو نو ، جاميه ، ايمبوسيبول
ثقافة بقى لازم تثقفوا لى بقى يا جماعة :))
فيعني سنة مية مية ودى طبعا القنبلة التانية
انى اول دفعة تدخل المدارس وفي اثناء وجود الوباء المنتشر ياارب احفظنا
كان ايه اللى حيحصل لو تضيع سنة من عمرنا بس نعيش واحنا كويسين وبصحتنا
في ستين داهية سنة مش مشكلة لما يلغوها
ولا انا اخد السنة وما اكملهاش واموت كمان
دى تبقى مصيبة !!
دة اللى انا حاسة بيه
وتقدروا تعتبروه مذكرات واحدة داخلى على ثانوية عامة
وافتكرت مدونة الاخ الفاضل / محمد الدخاخنى
كان اسمها اوراق طالب ثانوى
فبوجه له سؤال
يا ترى انت عملت فيها ايه لو مش عايزها سلمها لاختك الغلبانة تعبر فيها عن مشكلتها الكبيرة
وعن اللى حتواجهه خلال المرحلة دى
والله كانت مدونة جميلة جدا مش عارفة اتقفلت ليه بس الجديدة حلوة برده شرنقتي الخاصة
اه ما هه حضرتك خلصت من جو الثانوية العامة ومرتاح ما شاء الله الله اكبر اللهم لا حسد
نفسي احس احساس حضرتك دلوقتي والله
بس حاسة انى داخلة على مرحلة مافيش منها خروج ولا مفر
فادعولى بالله عليكم
واسفة جدااا ان كنت قصرت معاكم في التعليقات والردود والمتابعة
بس والله كنت مشغولة جداا وكمان مدونة حكايات وفاء بتاعتى
طلعت مسئولية كبيرة اوووووى
فبالنسبة للبناتيت اللى بيتابعوها مش حوعدكم انى حنتظم في تنزيل الجديد
بس ححاول بقدر الامكان انى اخزنهم في الوورد وكل اللى يبقى عليا انى اخد كوبي وبيست
مع شوية التعديلات وكدة يبقى الموضوع اسهل بكتييير
ادعولى الله يكرمكم بجد خاايفة جداا
ومعلش طولت
وبوجه كل سلامى الى كل افراد اسرتي الكريمة ( انتوا مش اهلى !! وهو انا حوجه لهم ليه يعني ماهما في وشي ليل ونهار :)) )
وبجد بدعيلكم من قلبي ان ربنا يوفقكم ويعينهم
واللى خلصوا الثانوية ( انا مش بحسد والله ) بس ادعولى انضم للحزب بتاعكم بتاع ( مخلصين ثانوية عامة وازهرى !! )
واللى لسة ما انضموش بقولهم ما تقلقوش يا جماعة خليكم زيي كدة انا مش قلقانة خااااااالص !!!!!!!
معلش طولت بس بجد طلعت اللى جوايا
سلام
37 جزاهم الله خيرا علقوا:
اول تعليق محجوز لحبيبتي ماميلا
صحيح غايبة بقالها كتير
بس برده لازم يكون لها شأنها
بحبك يا لولو
محجووووووز
وتانى تعليق ليا بقى
ازيك ياندى ياقمر اخبارك ايه
طبعا انا شايفة انك ياعينى عودة المدراس عملتلك ازمة معلش ياقمر ان شاء الله خير ومفيش حاجة باذن الله هتحصل
وربنا يستر على كل الناس والمفروض الحكومة كانت اجلت المدراس شوية لغاية ما الحكاية بتاعت الانفلوانزا تتحل
اما بخصوص علمى ربنا معاكى ويعينك يارب انا كنت عملى علوم فى تانية حبيت اهرب من الرياضة بادبى لقيت الرياضة كمان فى ادبى قولت يبقى خلينى علم علوم والمجموع كان زبالة بسبب الرياضة لكنى بكره الهندسة والتكامل والتفاضل والاهم ده كله
بس حولت ادبى فى تالتة والحمد لله جبت مجموع حلو عدلى مجموع تانية انتى بس شدى حيلك يادكتورة ندى
السلام عليكم اختى الغاليه جدا ندى كل سنه وانتى طيبه انتى عارفه انى بتكلم بدون تجميل للكلام المدرسه شىء اساى فى حياتنا حتى بعد ماتخلصى هاتحسى نفس الاحساس عند دخول المدرسه المهم تبقى فاهمه من اول يوم انتى عاوزه ايه وطبعا الدروس الخصوصيه بقت طول السنه يعنى مابقتش تفرق كتير
شاعر الاحزان
ادخلى علمى او ادبى
المهم
تدخلى القسم اللى بتحبيه
وهتعرف تذاكرى فيه
تحيه لاسعه
السلام عليكم
يا قمر سيبيها على الله كله هيعدى
انتى شوفى ميولك ايه تحبى تفهمى ولا تحفظى
وبعدين هتخلصى ثانويه وكليه باذن الله
وتقولى ياريت الايام دى ترجع تانى
المنبه
كابوووووووس بالنسبالى اول مااسمع صوت منبه افتكر المدرسه
والله ياندى فعلا ايام جميله وانا عن نفسى اسمتعت فيها جدا الصحبه اهم حاجه فيها كنت انا وصحبتى نتصل ببعض اقولها انا خلصت الجزء الاول ونسمع لبعض وناخد البريك مع بعض واول مايخلص البريك نرن على بعض و عشان نبدأ تانى المذاكره والله فعلا ايام ممتعه
وشوفى ميولك ايه وانتى بتحبى ايه اكتر و متخفيش من العلمى اوى هو صعب بس شيق وجميل
وبالتوفيق بأذن الله ياقمرتنا
وهصحيكى الصبح اصبح عليكى وانتى نازله المدرسه
هو من ناحية طولتى فانتى فعلا طولتى بس مش فى الكلام لاء طولتى على نفسك الخوف والقلق ليه كل ده يعنى هو طبعا كان المفروض ان الدراسة تتاجل بس اللى حصل حصل مين هيعترض يعنى ،، ربنا يستر على كل الناس اللهم امين يارب
اما بخصوص العلمى والادبى دى طبعا مش فيها كلام خالص لان كل واحد وله ميوله اللى هو حاسس بيها اوى وعارف انه هيقدر يحقق اللى بيحلم به
ربنا معاكى يا رب ويعدى ايامك كلها على خير وان شاء الله فترة الثانوى هتعدى بسرعة اوى لان الايام بتجرى اسرع مما تتخيلى
السلام عليكم ورحمة الله وبركاتة ,,
ربنا يوفقك يارب فى كل حياتك ان شاء الله ... وربنا يكرمك لانك انسانة طيبة وفيكى خير وربنا يجزيكى خير اللهم امين .. وربنا يثبتك على طاعتة وحسن عبادتة ان شاء الله دايما .
بالتوفيق فى القادم
ربنا يكرمك ويسعدك دايما
كل سنة وانتى طيبة ياجميللللل
شدى حيلك
عايزين تفوق
كل سنة وانتي طيبة
وربنا يجعل تفوقك منفعة لامتك ودينك
ومش مهم علمي ولا ادبي
المهم تتفوقي في مجال باذن الله
ياجميلة انتي
ربنا يوفقك وتختاري حاجة ترتاحي فيها
مبسوطة بتواصلك معي
كل الحب
ياجميلة انتي
ربنا يوفقك وتختاري حاجة ترتاحي فيها
مبسوطة بتواصلك معي
كل الحب
السلام عليكم ورحمة الله وبركانه
بداية كل هام وزانت بخير بعودة الدراسة
اما عن علمي وادبي فانت وحدك من تحددين
ما هي ميولك ما هو طموحك
ولما هو القسم الذي تستطيعين التفوق فيه
وبالتوفيق ان شاء الله
الله يوفقك إن شاء الله
ولعلمك : الثانوية مااعتقدش ان في اسهل منها ..
محتاجة تركيز ومتابعة وبس
والله يصلح حالك وموضوع العلمي حاجة مميزة جدا ..
والانفلونزا متقلقش ولا حاجة دا لعب عيال :) بس المصل له اعراض جانبية علي حسب ماسمعت فبلاش منه اصلا وربنا يجعلها سنه سعيدة عليكي
اسفة جدااا للتأخير على الرد عليكم
ايوشة ..
منورة المدونة وصاحبتها واصحاب صاحبتها وكله
حمدا لله على السلامة يا قمر
ازمة بس ؟؟! لا كل شيء يجيب اكتئاب
عملته لى المدارس
ربنا يستر
بتقولى لمين ؟؟ بتكلمى الحكومة ؟؟! اه ان شاء الله اول لما الوباء يروح حتأجل على طول
ههههههههه
ماهه انا خايفة تنزل القنبلة الرابعة ولا الخامسة ويلغوا موضوع التحويل من علمى لادبي دى تبقى مصيبة
ربنا ييسر ويستر
امين يارب
نورتى يا قمر
memo ..
لا لا لا لا
والله ما مصدقة شاعر الاحزان بنفسه نورنى
يا سلام يا سلام دة ايه الهنا اللى انا فيه دة
منور منور منور منور يا شاعر
وعليكم السلام ورحمة الله وبركاته
وانت طيب وبخير ياااارب
لا السنة دى مافيش دروس للأسف
قرار وزارى من الامن المستتب ( بابا )
" مافيش دروس السنة دى يا ندى "
وانا " في سري ( يالهوى يا لهوى ) احم احم اه طبعا يا بابا !! )
هههههههههههههههههههههه
بجد سعيدة جدا لمرورك
ادعيلي
ومنورنى جداا
لاسع افندى ..
ماهه المشكلة ان اللى انا بحبه بيقولولى صعب
دى في حد ذاتها مشكلة بيحبطونى والله
منور المدونة دايما يا لاسع افندي
شكرا لمرورك
ليس فقيرا من يحب ..
الجميل بنفسه ( يا كسوفي :) )
ازيك يا قمر
وعليكي السلام ورحمة الله وبركاته
لا انا عن نفسي مش حقول كدة خالص
انسى
بقولك ايه عايزة اتعرف عليكي
بجد نفسي اووى
لو توافقي طبعا
منورة المدونة
راجية الرحمة ..
اهلا يا معلم
ههههههههههههههههههههههههه
يا شيخة بلا ايام ممتعة بلا كلام فاضي
دة انا نفسي بس اخلص من الدراسة ومش حوريهم وشي
ومش حدخل عيالى مدارس يتنقطوا فيها
هو دة تعليم بالله عليكي ..
عارفة لو رنيتي عليا الصبح حوريكي حعمل ايه ايوة بتغيطونى ما انتى نايمة يا هانم وولا على بالك
ايوة ايوة
ههههههههههههههههههه
الله اكبر في عينيا
وحشانى يا جميل
بحبك اووى
اسماء واحلام في وجدانى ..
بعبر عن جزء من اللى حاسة بيه
امين ياارب
والله لسة حاليا بفكر اخليني ادبي مضمون يعني
مش عارفة ربنا يسهل
بس حضرتك ادعيلي
امين يااااااارب
منور المدونة جداااا
شكرا لمرورك
طهر فؤادك ..
وعليك السلام ورحمة الله وبركاته
يااااااارب امين
ربنا يخليك ياارب دة بس من ذوقك
امين ياااااارب
منور المدونة جدااا والله
وبالنسبة للشكر والكلام دة
و الله مافي له اى داعى بالعكس انا مقصرة جداا في حق الجروب بس والله لانى مش بدخل كتير
لكن ان شاء الله عما قريب حتلاقي شغل جامد اوووى
بس انت ادعيلي
منور المدونة اخى الكريم
شكرااا جدااا لمرورك
mohamed galia ..
بجد محروجة جدااااا من حضرتك
داميا منورنى وانا مقصرة في حق مدونتك جدااا
بس والله مشغولة خالص
ربنا ياارب يتقبل منك دعائك دة
امين
وشكرا جداااااااااااااااا لمرورك وتواصلك الدائم
ومازلت اتعلم ..
وانتى طيبة يا قمر
ما اوعدكيش في موضوع التفوق دة بس ربنا ييسر
امين ياااارب
منورانى على طول يا حبي
هعزف لنفسي ..
وانت طيب يا عازف
امين ياااااارب
ربنا يسهل وادخل حاجة وما اندمش عليها
امين ياارب
صحيح ،،
ربنا يفك كربك ويفرج همك
امين ياارب
منورنى
جارة القمر ..
انتى الاجمل يا حبيبتي
امين ياارب
تواصل ؟؟ بتكلميني انا
دة انا مقصرة جداا في حق الجميع
بس وهو انا اقدر انساكى يا قمر
حمدا لله على سلامة ماما يا قمر
ربنا يتمم شفائها على خييير يااارب
نورتى يا جميلة
ابو صهيب ( الجمعاوي الاصيل)سابقاً ..
وعليكم السلام ورحمة الله وبركاته
وحضرتك طيب وبخير ان شاء الله
ربنا يسهل واعرف اختار واحدد صح
شكرا جدا لمرورك
نورت المدونة
دكتور لذيذ ..
امين ياااارب
لا لا ما اتفقش مع حضرتك خااالص
دى صعبة جدا والله
يمكن علشان اول سنة بالنسبة لى
يمكن !!
امين ياااااارب
طيب طمنتنى والله ( شوية يعني مش اووى )
الحمد لله على كل حال
كل واحد بياخد نصيبه وقدره
وليس له حق الاعتراض
امين ياارب واياكم
شكرا جدا لمرورك واسفة لتقصيري معاك
منور
شكرا لمروركم كلكم يا جماعة
بجد نورتونى
ربنا يوفقك في حاتك ويكرمك يارب
اسلوبك يدخل القلب بسرعة
موفقة يارب
كل الحب
السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشاركى معانا فى حملة نصرة الاقصى والموضوع بسيط جدا وياريت تشوفى موضوعى على مدونتى وتقوليلى رأيك.. رأيك يهمنى اكيدددد ..
جارة القمر..
امين ياارب
ربنا يخليكي يا قمر
نورتى المدونة والتعليقات مرة تانية وعلى طول ان شاء الله
طهر فؤادك ..
وعليكم السلام ورحمة الله وبركاته
ربنا يخليك ياارب
طبعا معاكم سواء كان الموضوع بسيط ولا لا
دى الاقصى مش اى حاجة
نورت يا فندم
وتم العمل باللى طلبته الحملة
معاكم ان شاء الله
بسم الله
ربنا يوفقك يارب وتخلصى ثانوى على خير وكليه كمان وان شاء الله تدخلى طب
بس اهم حاجه تدخلى اللى بتحبيه وخلى عندك ثقه فى الله ثم فى قدرتك على التفوق ومادام انتى بتحبى المجال هتتفوقى فيه ان شاء الله
اما بقى بالنسبه للتطعيمات مين قالك انك خلصتى منها ده احنا لحد اخر سنه كليه كنا بناخد تطعيمات .. شر لابد منه يابنتى
ربنا يوفقك ياارب وجميع المسلمين
فى رعايه الله
السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله
إرسال تعليق