قطراتي >> كل عام وانتى بخير

♥Happy Birth Day♥

اد ايه كنت منتظرة اليوم دة بفارغ الصبر



واخيرا اتممنا سنتين
سنـــــــــــتيــن
حقيقي ... ماخبيش عليكم انى ناسية يوم عيد ميلاد مدونتى الحقيقي
ولان انا كنت كاتبة اول بوست في التاريخ دة " بس تم حذفه "
خليته يوم عيد ميلاد مدونتى
في بداية الحفلة .. احب اشكر كل المدونين والمدونات اللى تابعونا
واخص بالشكر / بنت الحرية
اللى لولاها ماكانش في وجود للمدونة دى
واللى لولاها ماكنتش اكتشفت انى بحب الكتابة اوى كدة
اينعم كنت بكتب كلام اهبل في الاول
واينعم كانوا بيجاملونى في التعليقات
بس حتى مجاملتهم دى اديتني الحافز انى اكتب واكتب واكتب
لغاية ماوصلت لدرجة الحمدلله انا راضية عنها اوووى

نبدأ حفلتنا بقى .. ومظبطاكم انا تورتة وعصير وو ..
معلش بقى اصله اول عيد ميلاد اعمله
التورتة



واحدة تانية للى مش بيحبوا الكريمة



العصائر



الشوكولاتة


..

كل سنة وانتى طيبة يا قطراتى
وان شاء الله يبقوا 100 مش سنة ولا اتنين
ربنا يخليكي ليا
ويقدرك على انك تستحمليني وتفهميني دايما
بحبك يا مدونتي
وبحبكم انتوا كمان يا مدونين
بجد حبيت العالم اللى جمعني بيكم لانى عرفت فعلا اصحاب بجد
يمكن ما اّنش الاّوان لسة انى اكلمكم او اتعرف عليكم شخصيا
بس ربنا وحده يعلم مكانتكم عندى
انتوا عالمي التانى والوحيد اللى بحس فيه بالراحة
ربنا يخليكم ليا دايما
وعارفة انى مقصرة والله
بس معاكم دايما على فكرة من غير تعليقات
وانتوا كمان اكيد نسيتوا مدونتى
بس يلا مانتوا برده معاكم حق انا مش متابعاكم " دة على اعتقادكم "
يلا كله يقول لمدونتى كل سنة وهي طيبة

تحدييييييث هام جدااااااااااااااااااااا..
حبقى خالتو يا جماعة لولولولولولولولولوللى

اهداء لحبيبة قلبي

اد ايه كنت غبييييييية لانى نسيت حاجة مهمة زى دى

اولا وحشتونى يا شباب جداااااااااااااا
واكيد نسيتونى بس والله مشغولة " اينعم مش اوى "
في واحدة من اعز اصحابي نجحت وطلعت التالتة ع المحافظة
مبروك يا دؤدؤ
وعلى فكرة يا شباب دعاء دى تبقى بنت خالى وكمان مدونة ممتااااازة جداااا
بس بعدت عن التدوين فترة لظروف معينة وان شاء الله حترجع قريب جدااا
الف مبروك يا قمر ولو انها متأخرة انا عارفة
ودلوقتي يا شباب عايزاكم كلكم تباركولها
بالله عليكم ماحد يخرج غير وهو سايب كومنت
الف مبروك يا دؤدؤ
♥ بحبك اوى ♥




تحديث ..
9/8/2010

انا لله وانا اليه راجعون

سلام عليكم ورحمة الله وبركاته

توفي اليوم والد اختنا الكريمة / سلمى

صاحبة مدونة رحلة الى جزيرة الحب

ادعوا الله ان يسكنه فسيح جناته وان يلهم اهله الصبر والسلوان

سلمى حبيبتي كلنا معاكى .. عارفة انك تعبانة ونفسيتك زفت

بس برده عارفاكى قوية ومؤمنة بالله وبقضاء الله وقدره

ربنا يصبرك يا حبيبتي يارب ..

وما تنسيش كلنا هنا معاكى .. واقفين جنبك ومش حنسيبك

ربنا يصبرك يارب

رابط المدونة

http://r7la.blogspot.com/

رجاء من الجميع .. قراءة الفاتحة

محمد غالية : هل تبحث عن السعادة

سلام عليكم

ازيكم يا شباب
طبعا كلنا عارفين اخونا الكريم محمد غالية صاحب مدونة هل تبحث عن السعادة
ربنا يباركله كتب كتاب بعنوان هل تبحث عن السعادة
وطبعا كلنا نتمنى له الخير والتوفيق والنجاح دايما
وطبعا كلنا عايزين نكون معاه في اليوم دة امال ازاى اصحاب واخوات ؟؟
تتشرف دار المصري للنشر بدعواتكم لحضور حفل توقيع كتاب هل تبحث عن السعادة للكاتب محمد غالية
بمكتبة عرابي المهندسيت وذلك يوم السبت الموافق 3/7/2010 في تمام الساعة السادسة مساء
ان شاء الله من نجاح لنجاح يارب كلنا بنتمنالك التوفيق والنجاح ربنا يسعدك يارب
يلا بقى كلكم روحوا باركوله في مدونته واعرفوا التفاصيل
http://mohghalia.blogspot.com/2010/06/blog-post_27.html
الف مبروك عليك وعلينا جميعا

ملاك الحب ..

كنت بقربه ملاكا طائرا في الهواء

يعيش على ارضه وعلى ماتمطر سماءه من ماء

احببت عيناه حيث اصبحت عمياء

والتقيت بيده فلم اشعر بالجفاء

انتقيت قلبه من بين النقاء

نطقت باول حرف من اسمه

وكم كنت سعيده لرسمه

لكم شعرت بحنانه وطيبة قلبه

وكم احتضنني وغمرنى بحبه

ضاعت حياتي معه

واصبحت في قلبه شمعة

انارت حياته وجففت كل دمعة

ذبت في بحره كالعاشقة

وجعلته مميزا ووضعت فيه كل الثقة

ولكم احب ان اراه وحدي

واعشق سماع صوته عندما يهدي

قلبي وعيني والعالم من بعدي

غرقت في بحر عذابه

وتطاير من على قلبي ترابه

وصار يغني ويتراقص مع الوان الحياة

وصرت اسمع كل البشر دون مناداة

اصبحت له وحده وامتلكت قلبه حائرة

اسيتركني يوما وحدي ويجعل منى فقيرة

ام سيظل ويجعل منى اميرة

بحاول اكتب أي حاجة عايزة ارجع زى زمان المدونة خلاص شكلها حتودع

دة اللى كتبته تقدروا تقولوا تهييس

دة اللى قدرت عليه :(

جزاكم الله كل خير يا محترمين !!

سلام عليكم
ازيكم يا شباب
يارب دايما تكونوا بخير يارب
دلوقتي كنت بس عايزة اقول كلمتين
انا برحب بكل زائر و زائرة يدخلوا مدونتى
وبقولهم نورتوها واتمنى اكون عند حسن ظنكم
بس برده اللى يدخل بيتهيألى يدخل بأدبه
ويراعي ربنا في كلامه قبل ما يشتم فيا وفي مدونتى
والله لو مش عجبتك المدونة اخرج وسيبها لكن انك تقول الفاظ زى كدة معلش انا مش حسمح
ومهما عملتوا طبعا انا مش حتكلم لان لو تدويناتى مش عجباكم كان ممكن
بكل صراحة تقولوا وجهة نظركم بحيث اخللى بالي منها بعد كدة
علشان تساعدونى انى اتطور واعرف اكتب كويس
وبيتهيألى اختلاف الرأي لا يفسد للود قضية
لكن انك تدخل تسيب لى رسالة في الماسج بوكس كلها كلام وحش وشتايم فيا وحاجات انا ما اقبلهاش
فانا بعتذر بصراحة لو كنت ضايقتكم بكتاباتي
بس كان ممكن تقولولى الكلمتين دول بالراحة وبالذوق والادب والاخلاق !!
مش بالطريقة دى
والحمدلله انا مقتنعة بمدونتى جدا وبحبها جدا وفي ناس كتير الحمدلله متابعاها وبتحبها
متشكرة جدا يا ميدو ويا حمادة ويا دودى ويا ساسو و يا روان ويا هانى
متشكرة جدا على تعليقاتكم المؤدبة
وجزاكم الله كل خير

كلماتى تحتويني

يشعر المرء باحساس غريب يدخل قلبه رغما عنه
والبعض الاخرون يشعرون بأن هناك من يحتويهم
فلن يفرق معهم اذا شعروا بهذا الشعور او لا
ولكنني لست من هؤلاء
فانا لا يدخل قلبي شعورا رغما عنى
ولا اريد ان يحتويني احد
هناك واحدا فقط هو المسموح له بذلك
..
كلماتي تحتويني
نعم تحتويني
فكم اشتاق لأن أرتمي بحضن قلمي
وكم اتوق لان اتذوق حبره
وكم اشعر بالسعادة واللذة عندما يسري قلمي بحبره على الاوراق
لست في غنى عن هذا القلم
ولكنني في غنى عن كل الناس
لا اريد ان اسير في طريق لا اعرف له نهاية
لا اريد ان اشعر بالقلوب التي تهوى الاستسلام لليأس
ارى اناسا هنا وهناك
ولكنهم بالفعل ليسوا اناسا
بل اشباح رسمها خيالي الذي اطلقت له العنان
وسمحت له بتجاوز وتخطي الحواجز والحدود
فانا بالفعل لا اريد ان يقتحم حياتي اناسا
وكانهم يغمرون قلوبهم في دمائي ويتحولون الى اشباحا حمراء
وكأنهم شياطين
لا اريد شيطانا ولا شبحا وانما فقط افتقر للأمان
يا الهي هل بات هذا الامر مستحيلا في هذا الزمان ؟؟
هل يصعب على فتاة مثلي ان تلتقي بأحد يحتويها ؟؟
اذن لا اريد اناسا منك ايها العالم
فقط انا بحاجة الى قلمي وحبره
حبر القلم لا ينتهي ابدا
فهو كالبحر الذي اعشق ان ارمي نفسي فيه
واهوى ان تتلاطم امواجه مع قلبي
لا اريد مركبا ولا سماء ولا سحاب
لا اريد رجلا ولا امرأة
لا اريد شيئا غير الامان
واخيرا وجدته ايها القلم الحبيب
وجدت بحرا من الدموع
لكل دمعة اسيرة حرفا !!
وكانت اشبه باللغز الذي واخيرا استطعت حله
كم عانيت لاجمع الدمعة بالاخرى وان افتش عن الحرف واحاول ..
احاول مزجه بالاخر كي تتسنى لي الفرصة ان افهم
ربما استطيع فك شفرات هذه البحار
وبالفعل استطعت
وجدت مفتاحا لمدخل الحياة
الا وهو ان الحياة لا تنتظر احد
بل تسير كالقطار السريع الذي لا ينتظر احد ولو للحظة !!
ولكنه يسير رغما عنه وكم يفتقر لان يرى بشرا يقفز الى داخله
والكل نائمون يا قلمي
الكل نااااائمون

ليكوا وحشة يا ولاد الايه !!

سلام الله عليكم ورحمته وبركاته

ازيكم يا شباب والله والله وحشتونى اووووى
ايه اخباركم
طبعا مش حعتذر تانى عن تقصيري في المتابعة
رغم انى ماليش حجة اهه مابذاكرش ودايما موجودة ع النت بس مش بدخل مدونتى
لان كان عندى مشكلة في التعليقات بس صلحتها وبرده مش بتابع حد خالص
والله ما عارفة دة من ايه
وسعيدة جدا والله انى على بال صحباتي المدونات ( اللى ماحدش منهم فكر يتصل يسأل عليا حتى أندااااااااااااال )
عموما مش حتكلم في اللى فات
لان اللى فات حصل فيه كتيييييير
نتيجة وامتحانات وحوادث وقرف
كل واحد يا جماعة ياخد باله من العربيات اللى في الشوارع
لحسن وانت ماشي في امان الله تلاقي اللى جاي طاااااااااخ عليك
وانا موعودة بقالى اسبوعين بالحوادث في ايدي
الحمدلله على كل حال
وزى ما قلت لكم مش حنتكلم في اللي فات ^_^
اهم حاجة انكم بجد وحشتونى
بقالى اسبوعين بدخل المدونة بحاول اكتب اى حاجة
بفضل امخمخ في كلمة .. وكالعادة الكلمة حتجر اللى بعدها يبقى بوست
بس بفضل افكر افكر افكر وفي الاخر ازهق واصدع وانااام
او اكتب حاجة وماتعجبنيش اقوم مسحاها واقفل
قلت النهاردة لازم ابين لكم انى موجودة ومعاكم بالقراءة بس ماكنتش بعرف ارد
مش عارفة بحجة ايه بالظبط تقصير ولا مشاكل البروفايل ولا كسل
الله اعلم والله
بس برده لسة بحبكم جداا وماحدش فيكم غاب عن بالى ابدا
سلامى ليكم جميعا
وعلى فكرة كل يوم بدعيلكم انتم بالذات
ربنا مايحرمنى منكم ابدا يا اغلى اصحاب
..
بالنسبة للشباب اللى بيتابعونا على مدونة حكايات وفاء
عارفة انى بقالى كتير ماحطيتش بقية القصة وواضح ان في ناس كتير حتنسى المدونة
بس ممكن النهاردة ان شاء الله او بكره ابدأ انزل تانى في حلقات " سمير و وفاء "
فخليكم متابعينا علشان حتلاقونا قريب اوى ان شاء الله
يلا احبائي اسيبكم في رعاية الله
ادعولى كتيييييير

♥ في مثل هذا اليوم ♥

في مثل هذا اليوم
اهديك هدية لعلها تنال اعجابك
لكن لا اعتقد ذلك
لا توجد على ارض هذه الدنيا هدية واحدة تكفيك
حبيبي
سبق وان وعدتك بانه لن يفرقنا شيء
الى الاّن افي بوعودي وسأظل حتى يفرقنا الموت
!!
ولكن اتعلم ان الموت حتى لن يفرقنا
سأظل كالطيف ارفرف حولك
لن أجعلك ابدا وحيدا
حتى اذا فقدت الكون كله
سأظل انا عالمك
وستظل انت قمري
الذي اخاف يوما من ان اطير اليه
لأننى اعلم اننى لن اتركه ابدا
شبهتك بالبحر يا عمرى
لذا اعدك اننى بيوم من الايام سألقي بنفسي اليك
أعلم سأغرق ولكن سينقذني حبي
ففي مثل هذا اليوم
ولد في قلبي قلبا جديدا
اصبح ينبض نبضتان
احداهما باسمك والاخرى باسمي
وسيظل ينبض
ولن يموت
..
والاّن انالت هديتي اعجابك
ام اننى لم اجد ما يصف لك بالقدر الكافٍ !!
اذا لم تكفيك كلماتى الغارقة في بحر حبك وحنانك
استكفيك كلمة
♥♥ احبك ♥♥

فقط اليكـ ..

اذا غابت الشمس يوما

فلن يضئ قلبي بدونك

واذا غاب القمر يوما

فلن تغمض ابدا عيوني

واذا اختفت النجوم ليلا

فلن ترشدني السماء وحدها اليك

واذا اضاءت النجوم فجاة

فقط سأراها في عينيك

واذا اقام البشر كله سباقا

فلن يسبقني احد اليك

..

الى متى سيظل قلبي مقيدا .. الى اين سأذهب ليظل البحث جاريا

لازال البحث جاريا

لازال الحب متخفيا

لازال القلب خائفا

لازال الحلم ضائعا

لازالت البسمة في اصعب الاوقات ضعفا

ولا زالت الحياة طريقا ضيقا

الى متى سيظل قلبي مقيدا والى اين سأذهب ليظل البحث جاريا ؟

يا حلم اشتاقت يداي لان تلتمسه

يا عشقا اتوق يوما لرؤيته

يا مطرا تشتاق الورود لتذوقه

الى متى سيظل قلبي مقيدا والى اين سأذهب ليظل البحث جاريا

الى بلادا تبعد مسافات

والى حلم بدأ يوما بالتفاهات

والى شيخ قال يوما

لا يوجد يا بنتى حبا والا قد يأتى يوما ويكون مات

الى متى سيظل قلبي مقيدا والى اين سأذهب ليظل البحث جاريا

الى مدينة عظيمة سكنتها الاّهات

ام الى قرية صغيرة واجهت الصراعات


الى متى ستظل يا قلبي مقيدا والى اين ستذهب ليظل البحث جاريا

كتبنا رقم واحدة مرة .. واتنين كتباناها برده .. والمرة دى بقولها وبقلب جامد هييييييييييه تاج تلاتة

اتاخرت جدا في الاجابة عن التاج
وللعلم كمان الاجابة مش بالتفصيل
او يعني مش كاتبة كل حاجة عن السؤال
كاتبة بالمختصر المفيد وبس
بس يلا
ربنا يعلم مشغولة جدااااااااا
رغم انى ما بذاكرش اصلا غير مواد الدروس
وربنا يستر السنة دى
ادعولى بالله عليكم


اسمك؟
ندى


سنك؟
15 وشهر خمسة اكمل 16 ( حطلع بطاقة ) ^_^


اسم مدونتك؟
قطرات ندى
حكايات وفاء
وعندى واحدة تالتة
بس مش كل الناس تعرفها



مجال دراستك؟
حاليا معايا اعدادية ، وانا في اولى ثانوي :)


هل فكرت فى اغلاق مدونتك؟والسبب؟
اه فكرت .. تقدر تقول مدونتي بتعبر عن نفسي
فلما بكون متضايقة بقفلها لغاية ما ارجع لطبيعتي وارجع لها.. بس


ايه رد فعلك لو حد قل ادبه عليك في المدونة؟
والله هي حتبقى صعبة بس انا ممكن اتعصب وازعل بس في نفس الوقت انا من النوع الطيب جدا لدرجة الهبل
بس طبعا حرد بأدب بس ادب يحرج شوية


أسوا مدونه دخلتها؟
ما اعتقدش انه في مدونة سيئة

هيحصل ايه لاميلك بعد ما تموت؟
حيموت :(


اديت الباس ورد لحد قبل كدة؟
اه اختي عارفاه


السفر بالنسبه ليك؟
يانهار ابيض متعتي الوحيدة


المود بتاعك اية؟
دايما حزين
بحب المود الحزين انا اوى
حتى برده معظم كتاباتي حزينة
او بتحكي عن حاجة مؤلمة


بتعمل اية فى وقت فراغك؟
بقعد هنا في مدونتي


الاكلات المفضلة؟
المكرونة طبعا



الصفات التي اخدتها عن والدك؟
العصبية واحيانا او كتير العناد


الصفات التي اخدتها عن والدتك؟
العصبية برده


اكتر 6 حاجات بتحبهم؟
مدونتي
السفر
اصحابي
النت طبعا
الاطفال يااااااه عشق حياتي
الخروج لواحدى او مع صاحبتي

اكتر 6 حاجات بتكرهم؟
1)الكذب
2)الخيانة
3)الخداع
4)ان حد يتكلم عليا مش كويس وهو عارف انى كويسة
5)الاحراج
6)نفسي :)


شخصيتك نوعها ايه؟
شخصية طيبة جدااا ودة اللي بيقولوه عنى
+ انى وفية وسيكولوجي ^_^


لماذا دخلت عالم التدوين من الاساس؟
ما كانش لا بيا ولا عليا لقيت واحدة الله يمسيها بالخير زقتني ودخلت عليه وبعد كدة قعدت اكتب كلام اهبل لغاية ما بصيت لقيت ان في تطور وبقيت بكتب خواطر وكلام اهبل برده :)


اهميه التعليقات بالنسبه لك؟
بفرح بيها اوووى
بتحسسني اذا كنت فعلا كتبت حاجة حلوة او لا
وربنا يستر وماتكونش كل التعليقات مجاملة
تبقى كارثة


احلي بوست كتبته مع ذكر السبب؟
كتيييييييير
النجوم السوداء
عشاق ونقول رفاق
معجزة الليل تاني خاطرة ألفتها
ويبقى انا وانت والحب يا قمر



افضل مدونه قريتها؟
كتير
كل اللي في الريدرعندي بحبهم جدااا
وبعشق مدوناتهم رغم الانقطاع عن المتابعة


اهميه الانترنت بالنسبالك؟
هو كل حياتي وبيه عرفتكم


اهداء التاج؟
كل اللى في القايمة
ومحدش يطنش
واللى حيطنش يا ويله


بالله عليكم تدعولى

معجزة الليل* تانى خاطرة من تاليفي*

اعذرونى مش عارفة اجاوب على التاجين

بس حجاوب عليهم في اقرب وقت ممكن ان شاء الله

ودلوقتي اسيبكم مع تانى خاطرة من تأليفي ويارب تعجبكم .. :)

اروى لك قصة النجوم يا صغيرتي

كنت في يوم شاردة وجلس خدي على يدي

وانا ارى نجما ليس له مثيل

ولكنه ابعد من بقية النجوم

اذا مددت يدي فاذا بنفسي ممسكة بنجمة اخرى

وليست النجمة التي اشتاق للمستها واتوق لرؤيتها عن قرب

النجمة التى تدب الحياة في قلبي وتمطر بدموعها في عيوني

فبكيت .. فاذا بها تقترب منى وتمسح بيديها دموعي

فابتسمت ببسمة امل قائلة : لم تبتعدين ؟!

فأجابتني بخجل : انتى من ابعدنى .. كلما اقترب تبتعدي

نظرت بغرابة شديدة .. محال ، لم اتحرك من مكانى يوما وانا انظر اليكي

ابتسمت وقالت : هذا ما يبعدنى عنك ، حاولتى فقط البحث عنى حبا لمظهرى الذي يضئ الليل وليس لما اعطيك اياه

تغازرت دموعى وقلت لها : ولكنى اشتاق اليكي

قالت فقط .. اذكريني

فبكيت بكاءا شديدا ، علمت انا مثل بقية النجوم التى تأتى فقط لتحبها ثم تتركك لتشتاق اليها

تركتني النجمة وذهبت

ويوميا انتظر بشوق ولهفة وانا انظر من نافذة غرفتي واقول

اذكرك .. واشتاق اليكي

فاذا بسهم كبير ياتى من هناك ومعه نجمتى ، ويشاء القدر

ان ارى نجمتي .. بدون نفس ولا حراك

فاصرخ باعلى صوتى

ااااااااااااااااااااااااااااااااه نجمتى !!

وابكي على يداها التى كانت تقتل في قلبي الحزن والتى دبت فيه الحزن مرة اخرى لفراقها

واذا بها تنطق بكلمة واحدة فقط ..

سأذكرك .. فأذكريني

لم اهتم بالنظر اليها اكثر من اهتمامى بأن اخرج كل ما في عيونى من دموع

واجد نفسي امسك بيداها والمس نقطة من دموع عيناها

فاقول انا ودموعى .. سأذكرك

انت النجوم .. وليس كل النجوم انتى

سأذكرك يا نجمتى .. فاذكريني

واذا بنفسي ينقطع مرة بمرة

ولسانى ينطق بــ ..

سأشتاق اليكي .. بل اشتقت اليكي

اهداء الى نجمتى الوحيدة / خالتى رحمة الله عليها ( ماما ايمان )

ماما ... اشتقت اليكي .. فاذكريني

اليك عمور ..

السلام عليكم ورحمة الله وبركاته
اهداء الى اخى في الله عمور
ربنا يعلم كويس اووووى قد ايه بجد حزينة جدااا بس اللي حصل لحضرتك
وما اعتقدش انها اول مرة تحصل معاك
واعتقد انك كمان قدها وقدود اووووووووى
سيبك منهم وكفاية انك فخور بنفسك وصدقني بينتظرك مستقبل باهر ما شاء الله
كان نفسي تضامنى معاك ما يباقش بمجرد كلام وبس
لا بفعل وفعل كبير كمان وياريت والله بايدي حاجة اقدمها لحضرتك
لكن مافيش في ايدي غير الدعاء
ربنا يعينك يارب ويوفقك ويجعل كل دة في ميزان حسناتك ويصبرك يااارب
امين
اتعودنا على كدة يا عمور
احنا من صغرنا واحنا متعودين على ظلم وقهر وحاجات تانية كتير بدون توضيح
استفدنا ايه ؟ ما استفدناش حااجة خالص
بس كفاية عليك انك عندك ناس كتير بيحترموك وبيقدروك وعارفين كويس اوى مين هو عمور
وكفاية كمان انك راضي ومقتنع باللى بتعمله ايا كانت وجهات نظر الاخرين
علشان كدة بعلن تضامنى معاك وانى جنبك بسلاح قوي جدااا وهو الدعاء
قسما بالله لن انساك من صالح دعائي
اكرر قسمي بالله انى لن انساك بصالح دعائي
وربنا يصبرك ويعينك ياارب

لكل اللى عايز يعرف القصة واللى مش عايز يعرف برده
دى مش قصة واحد بس دى قصة بلد بأكملها
اللى حصل مع اخونا ممكن يحصل معايا ومعاك
ودة يدل على استهزاء الحكومة بالرأي الشخصي والحرية
وان الحرية مش موجودة غير مع الكبار بس
يعني وفروا الحرية للكبار فقط !!
يعني حتى الحرية بقت بتمن دلوقتي
قولولنا نعمل ايه ؟؟
حسبي الله ونعم الوكيل
لمعرفة القصة كاملة رجاء ادخلوا الى الرابط التالي ..
لسة عايش
وخليك زى ما انت يا عمور
خليك ( لسة عايش ! )

عشاق ونقول رفاق

عشاق ونقول رفاق
لو كنا يوم بعدنا
بنرجع تانى نشتاق
قلوب خفاقة
وعيون مشتاقة
امتى اللقاء
قريب ولا بعيد
محتمل ولا اكيد
ولو مش النهاردة
حستني نهار شمس جديد
تلف الدنيا بينا وتدور
ومهما ييجي الهوا مش بيطفي للشمع نور

ويبقى انا وانت والحب يا قمر

بكيت وبكى القمر
وتقاسمنا ليل السهر
بحزن شديد ودموع كالمطر
تذكرنا احلام تكاد تكون خطر
وايام للطفولة والصغر
كنا قلوب
وشاءت الاقدار ان تنفطر
ومرت الايام
وصرنا كذكرى او نسخ من الصور
والحب يجري في قلوبنا
والامل يكاد يتطاير
ونحن نقف ثابتون
دون اى اهتمام او حتى نظر
كأننا قلوب كالحجر
بعدما كنا كأوراق الشجر يا قمر
انتهى الحديث .. وزال المطر
ويبقى انا وانت والحب يا قمر

مافيش عنوان يعبر عن اللى حاسة بيه !!!

ابدأ كلامى
بحسبي الله ونعم الوكيل
مش عارفة في مين بس يلا حسبي الله ونعم الوكيل وخلاص
كتبت خلال الفترة اللى فاتت قبل الاجازة عن كابوس الامتحانات
ودلوقتي مش عارفة اكتب كلمة ايه غير كابوس تعبر عن كمية الحزن والخوف اللى انا حاسة بيه
ولو قلت كلمة كابوس دى حتبقى كلمة صغيرة اووى على الباشمهندس " المدرسة" !!
ومهما جيبت كلام فيه ولا عليه مش حوفيه حقه
الحاجة الوحيدة اللى مفرحانى وفي نفس الوقت مخوفانى
انى دخلت مرحلة جديدة " الثانوية العامة "
للللللللللووووووولللى
مين كان يصدق ان ندى العيلة الصغيرة دخلت ثانوية عامة
دة انا كنت ماسكة في ابتدائي بايدي وسناني
قضيت 7 سنين في ابتدائي
سنة مستمعة " يعني بسمعهم بس من غير ما امتحن ولا حاجة "
والخمس سنين العاديين
والقنبلة اللى بتنفجر فيا انا اول واحدة
انى اكون اول دفعة تتطبق عليها سنة سادسة ابتدائي
كانوا اللى يشوفونى يقولولى انتى مش عايزة تكبري بقى !!
مش قادرة اوصف لكم فرحتى اد ايه انى بقيت في ثانوية عامة
دة مفرحنى 30 %
اما ال 70% الباقيين
متقسمين ع الاّتى ( اختر الاجابة الصحيحة :)) )
ان انا للأسف للأسف اختى دخلت كلية خلاص ودى تاني سنة ليها
ربنا يوفقها يارب معنى كدة حتقعد تتريق عليا 24 ساعة وربنا ما يوريكم !!
ثانيا ان العبدة لله ناوية على علمى وكل اللى في العيلة لما يسألونى حتدخلى ايه
اقولهم علمى ( وكأنى قلت لهم بلوة ولا مصيبة او كأن يعني علمى دة عار في العيلة !!! )
يقولولى " اول واحدة حتطلع فاسدة في العيلة !! علمى يا بنتى ايه انتى بتهزري انتى عايزة تضحكي العيلة
علينا لما تسقطى من اول سنة !! خليكي ادبي دة علمي دة فيزياء وكيمياء واحياء ومصايب ما انتيش قدها )
احباااااااااط ربنا ما يوريكم وانا اقعد اراجع نفسي واقول لا لا لا علمى سهل وحلو وان شاء الله حعدى
والمشكلة ان اختكم كمان موسوسة يعني مش واثقة انى حوصل لمجموع حلو
وربنا يستر وماتنزلش عليا اى قنابل تانية وتقول انهم خلاص لغوا موضوع التحويل من علمى لادبي !!
ربنا يستر
بس انا اصلا بكره موضوع الادبي دة مين دى اللى عندها القدرة السنة دى تدرس تاريخ وفلسفة وعلم نفس
وحاجات غريبة
احنا نخلينا في اللى بنحبه
علمى علوم !!!
هو كدة يا اما بلاش
تالت حاجة بقى موضوع الانفلونزا دة .. والله انا مش حنكر انى خايفة منه بس مش اوى
اللى خايفة منه اكتر الحقنة بتاعت التطعيم !!!
يا نهااااااااااار منيل بستين نيلة ، حقنة ! لا لا يمكن انا اخد حقن
دة انا ما صدقت انى خلصت من ايام التطعيمات لا وايه
ماحدش يعرف ايه الحقنة دى ماممكن تكون حقنة 24 سنتيميتر تبقى مصيبة
انا مستعدة اعمل اى حاجة الا الحقن
نو نو نو ، جاميه ، ايمبوسيبول
ثقافة بقى لازم تثقفوا لى بقى يا جماعة :))
فيعني سنة مية مية ودى طبعا القنبلة التانية
انى اول دفعة تدخل المدارس وفي اثناء وجود الوباء المنتشر ياارب احفظنا
كان ايه اللى حيحصل لو تضيع سنة من عمرنا بس نعيش واحنا كويسين وبصحتنا
في ستين داهية سنة مش مشكلة لما يلغوها
ولا انا اخد السنة وما اكملهاش واموت كمان
دى تبقى مصيبة !!
دة اللى انا حاسة بيه
وتقدروا تعتبروه مذكرات واحدة داخلى على ثانوية عامة
وافتكرت مدونة الاخ الفاضل / محمد الدخاخنى
كان اسمها اوراق طالب ثانوى
فبوجه له سؤال
يا ترى انت عملت فيها ايه لو مش عايزها سلمها لاختك الغلبانة تعبر فيها عن مشكلتها الكبيرة
وعن اللى حتواجهه خلال المرحلة دى
والله كانت مدونة جميلة جدا مش عارفة اتقفلت ليه بس الجديدة حلوة برده شرنقتي الخاصة
اه ما هه حضرتك خلصت من جو الثانوية العامة ومرتاح ما شاء الله الله اكبر اللهم لا حسد
نفسي احس احساس حضرتك دلوقتي والله
بس حاسة انى داخلة على مرحلة مافيش منها خروج ولا مفر
فادعولى بالله عليكم
واسفة جدااا ان كنت قصرت معاكم في التعليقات والردود والمتابعة
بس والله كنت مشغولة جداا وكمان مدونة حكايات وفاء بتاعتى
طلعت مسئولية كبيرة اوووووى
فبالنسبة للبناتيت اللى بيتابعوها مش حوعدكم انى حنتظم في تنزيل الجديد
بس ححاول بقدر الامكان انى اخزنهم في الوورد وكل اللى يبقى عليا انى اخد كوبي وبيست
مع شوية التعديلات وكدة يبقى الموضوع اسهل بكتييير
ادعولى الله يكرمكم بجد خاايفة جداا
ومعلش طولت
وبوجه كل سلامى الى كل افراد اسرتي الكريمة ( انتوا مش اهلى !! وهو انا حوجه لهم ليه يعني ماهما في وشي ليل ونهار :)) )
وبجد بدعيلكم من قلبي ان ربنا يوفقكم ويعينهم
واللى خلصوا الثانوية ( انا مش بحسد والله ) بس ادعولى انضم للحزب بتاعكم بتاع ( مخلصين ثانوية عامة وازهرى !! )
واللى لسة ما انضموش بقولهم ما تقلقوش يا جماعة خليكم زيي كدة انا مش قلقانة خااااااالص !!!!!!!
معلش طولت بس بجد طلعت اللى جوايا
سلام

شاركونا في حملتنا " مدونتك حتنقذ طفلك "

فكرة حــــــملة" مـــــدونتك هتـــنقذ طفـــــللك "

- اولا اسم الحملة نابع من ان الاطفال الى ان شاء الله هنساعدهم (اطفال مستفى 57357 )زى اطفالنا فواجب علينا نعمل كدة او هنقدم حاجة بسيطة لمساعدتهم وان شاء الله تكون ليها اثر كبير بأذن الله وخير علينا كلنا بأذن الله ومش تفتكروا ان مسعدتكوا دى بسطة لا بالعكس ومش كلامى دة كلام رسولنا العظيم ومعلم البشرية جمعاء :-قال أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله وفي الباب عن أبي مسعود البدري وبريدة قال أبو عيسى هذا حديث غريب من هذا الوجه من حديث أنس عن النبي صلى الله عليه وسلم ...قوله : ( يستحمله ) أي يطلب منه المركب ( فحمله ) أي أعطاه المركب ( فقال ) أي رسول الله -صلى الله عليه وسلم- ( إن الدال على الخير كفاعله ) لإعانته عليه ، فإن حصل ذلك الخير فله مثل ثوابه ، وإلا فله ثواب دلالته قاله المناوي .

- هنســـــــــــاعدهم ازاى :---

- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا ) والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو http://www.57357.com/Default.aspx?PageContentID=8&tabid=155

وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....

1 - البنوك :- (ودى متركز عليها كتير فى وسائل الاعلام ومش هنخوض فيها ) .

2 - انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...

3 - التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان

4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .

5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386

**** حملتنا على ال facebook -

- ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-

1 - http://www.facebook.com/group.php?gid=139959994897&ref=search&sid=100000133813777.2100342868..1

**** وبعد ياجماعة ماستعرضنا كل حاجة عن الحملة عاوزين بقى ان شاء الله نبدأ بقى بأذن الله وتكون على خطوتين ان شاء الله :-

1 - ان كل صاحب مدونة او اى حد يقدر يساعد او اى حد يعرف صاحب مدونة يقولة على الموضوع وبعد كدة نحط زى ماتفقنا الصورة الى موجود بالاعلى واللينك زى ماشرحنا عن سابق ... وتخيلوا لو كل مدونة زارها فى اليوم 100 شخص او 200 شخص وضغط على اللينك وعرف طرق التبرع واتبرع تخيلوا الخير الى هيعم شكلة اية يأذن الله تعالى وان شاء الله ربنا هيوفقنا علشان نيتنا خير ان شاء الله وصدقة جارية كمان فى مدونتكوا ان شاء الله.. بقول رسول الله صلى الله عليه و سلم : « إذا ماتَ ابْنُ آدَم انْقَطَع عَملُهُ إلاَّ مِنْ ثَلاثٍ : صَدقَةٍ جارية ، أوْ عِلمٍ يُنْتَفَعُ بِهِ ، أوْ وَلدٍ صالحٍ يدْعُو لَهُ » - رواهُ مسلمٌ .

2 - نحدد يوم نحط الموضوع دة كلة بكامل تفاصيلة على المدونات الى هتشترك معانا فى الحملة ويكون يوم موحد ان شاء الله لكل المدونات وهنعرف اليوم دة من خلال تعليقاتكوا على الموضوع علشان يقرا اكبر عدد وتعم الفايدة والخير علينا كلنا بأذن الله وربنا يكرمكوا يارب ويوفقكوا ويثبتكوا على العمل الصالح وعلى شكرة وحسن وعبادتة اللهم امين ... ومستنى ردود فعلكوا ومشتركين ان شاء الله فى الحملة بأذن الله تعالى وانا واثق ان اهل الخير كتير والمدونات برضوا عددها كبير وان شاء الله الخير قادم بأذن الله ..

والسلام عليكم ورحمة الله وبركاته .. وعيد سعيد عليكم كلكم

تنويه هام : سنبدأ ان شاء الله فى النشر الجماعى ابتداء من يوم 29 / 9 / 2009 . (ساعدونا فى النشر ليعم الخير بأذن الله ) واحب ابشركم اننا بقينا حوالى 45 مدونة مشتركة معانا فى الحملة ونسعى للمزيد ان شاء الله بفضل الله وبفضل نشركم الجماعى بأذن الله .

وكمان كل اللى عليك انك تنقل البوست دة وتحطه في مدونتك
وطبعا بالاضافة الى الصورة اللى اتفقنا عليها فوق
وربنا يتقبل منا ومنكم جميعا
ويجعله في ميزان حسناتكم